habaru page ad two

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރ. ދުވާފަރަށް ކުރެއްވި ދަތުރުފުޅެއްގައި، އެ ރަށު ޞިއްޙީ މަރުކަޒުގެ އިތުރަށް ތަރައްގީކުރެވިފައިވާ އައު އިމާރާތް މިއަދު ރަސްމީކޮށް ހުޅުއްވައިދެއްވައިފިއެވެ. މި މަސައްކަތަކީ މި ސަރުކާރުން ދުވާފަރު ޞިއްޙީ މަރުކަޒު ހޮސްޕިޓަލަކަށް ބަދަލުކުރުމަށް ފަށާފައިވާ މަސައްކަތުގެ ދަށުން ކުރިއަށް ގެންދެވުނު މުހިންމު ފިޔަވަޅެކެވެ.

ރައީސް މުއިއްޒު ވަނީ ދުވާފަރު ޞިއްޙީ މަރުކަޒު ހުޅުވުމަށްފަހު، އެތަނުގައި ތައާރަފުކުރެވުނު އައު ޚިދުމަތްތައް ބައްލަވާލައްވާފައެވެ. މިގޮތުން ކުއްލި ހާލަތްތަކުގައި އަވަސް ފަރުވާ ލިބޭނެ ޒަމާނީ އިމަޖެންސީ ރޫމަކާއި، ދަތުގެ ޚާއްޞަ ޑޮކްޓަރުގެ ޚިދުމަތް، އެކްސްރޭގެ ޚިދުމަތް އަދި އަލްޓްރާ ސައުންޑުގެ ޚިދުމަތް ވަނީ މުޅިން އަލަށް ތައާރަފުކުރެވިފައެވެ. މި ޚިދުމަތްތަކުގެ ސަބަބުން ދުވާފަރުގެ ރައްޔިތުންނަށް ދިމާވާ ސިއްޙީ ކަންކަމުގައި ފަސޭހައިން އަދި އަވަހަށް ފަރުވާ ލިބިގެންދާނެއެވެ.

މި މަރުކަޒު ހޮސްޕިޓަލަކަށް ބަދަލުކުރުމަށް އަޅަންޖެހޭ ތިއޭޓާ ކޮމްޕްލެކްސްގެ ބިންގާވެސް މިއަދު ވަނީ އަޅާފައެވެ. މި ބިންގާ އަޅުއްވައިދެއްވީ ސިއްޙަތާއި ބެހޭ ވަޒީރު އަބްދުﷲ ނާޒިމް އިބްރާހިމްއެވެ. މި ރަސްމިއްޔާތުގައި ދުވާފަރު ދާއިރާގެ މެންބަރު މުހައްމަދު އަލީއާއި ދުވާފަރު ކައުންސިލުގެ ރައީސް ހަސަން ހަކީމު ބައިވެރިވެވަޑައިގެންނެވިއެވެ. (ވަގުތު އިމޭޖަސް: އަހުމަދު އަޝްހަދު)

ދުވާފަރު ޞިއްޙީ މަރުކަޒު ހޮސްޕިޓަލަކަށް ބަދަލުކުރުމުގެ މި މަޝްރޫއު ހަވާލުކުރެވިފައިވަނީ އަލްޓެކް މޯލްޑިވްސް ޕްރައިވެޓް ލިމިޓެޑާއެވެ. މި މަޝްރޫއުގެ އަގަކީ 25.5 މިލިއަން ރުފިޔާއެވެ. އެ ކުންފުންޏާ ހަވާލު ކުރެވުނު މި މަޝްރޫއު ހަ މަސް ދުވަހުގެ ތެރޭގައި ނިންމާ ގޮތަށް ވަނީ ހަމަޖެހިފައެވެ.

މި މަޝްރޫއުގެ ތެރޭގައި އޮޕަރޭޝަން ތިއޭޓަރު ކޮމްޕްލެކްސް އަކާއި، އައިސީޔޫ، ނާސް ސްޓޭޝަނާއި ޕްރޮސީޖާ ރޫމްގެ އިތުރުން މެޑިކަލް އަދި ނޮން-މެޑިކަލް ސްޓޯ ރޫމްސް ގާއިމް ކުރުން ހިމެނެއެވެ. (ވަގުތު އިމޭޖަސް: އަހުމަދު އަޝްހަދު) މި މަސައްކަތްތައް ނިމުމުން ދުވާފަރުގެ ރައްޔިތުންނަށް، ރަށުން ބޭރަށް ދާންނުޖެހި، ރަށުން ހޮސްޕިޓަލް ފެންވަރުގެ ޒަމާނީ ސިއްޙީ ޚިދުމަތްތައް ލިބިގެންދާނެއެވެ.

ރ. ދުވާފަރު ޞިއްޙީ މަރުކަޒުގެ އައު އިމާރާތް ހުޅުވައި، ހޮސްޕިޓަލަކަށް ބަދަލުކުރުމުގެ މަސައްކަތް ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުވާފަރު ދަތުރުފުޅާ ގުޅިގެން ރ. ދުވާފަރުގައި "އިރުން ހަކަތަ"ގެ ނަމުގައި އިޔާދަކުރަނިވި ހަކަތައިގެ މުހިންމު މަޝްރޫޢެއް އިފްތިތާހުކޮށްފިއެވެ. މި މަޝްރޫޢުގެ ދަށުން 2026 ވަނަ އަހަރުގެ ނިޔަލަށް ދުވާފަރުގައި އުފައްދާ ކަރަންޓުގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަށް ވަނީ ނިންމާފައެވެ.

މި މަޝްރޫޢު ފަށާފައި މިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ދުވާފަރަށް ކުރައްވަމުން ގެންދަވާ ދަތުރުފުޅުގެ ތެރެއިން ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ބައިވެރިވެވަޑައިގެންނެވިއިރު، "އިރުން ހަކަތަ" މަޝްރޫޢު ރަސްމީކޮށް ފަށްޓަވައިދެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރުއެވެ. މި މަޝްރޫޢުގެ މަސައްކަތް ކުރިއަށްގެންދަނީ މާލެ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިއުއެސްއީ) އިންނެވެ.

މި މަޝްރޫޢަކީ ދުވާފަރުގެ ކަރަންޓުގެ ބޮޑު ބައެއް އިޔާދަކުރަނިވި ހަކަތައަށް ބަދަލުކުރުމުގެ މުހިންމު ފިޔަވަޅެކެވެ. މި މަސައްކަތާއެކު ދުވާފަރުގެ ގޭބީސީތަކަށް އިޔާދަކުރަނިވި ހަކަތައިގެ މަންފާ ލިބި، ކަރަންޓު ބިލް ކުޑަކުރުމަށް މަގުފަހިވާނެއެވެ. މީގެއިތުރުން، ޑީސަލް އަންދާ މިންވަރު މަދުކުރުމާއި ޖައްވަށް ބޭރުކުރާ ދުމުން ތިމާވެށި ރައްކާތެރިކުރުމަށްވެސް މި މަޝްރޫޢު އެހީތެރިވެދޭނެއެވެ.

މި މަޝްރޫޢު އިފްތިތާހުކުރުމާއެކު ދުވާފަރުގެ ގޭބީސީތަކުގައި ސޯލާ ޕެނަލް ޖެހުމުގެ ފުރުސަތު ވަނީ ހުޅުވާލާފައެވެ. އަދި މި ފުރުސަތަށް އެދި ހުށަހަޅާ "އިރުން ހަކަތަ" ޕޯޓަލްވެސް ވަނީ ރަސްމިއްޔާތުގައި އިފްތިތާހުކޮށްފައެވެ.

ދިވެހިރާއްޖޭގައި އިޔާދަކުރަނިވި ހަކަތަ އިތުރުކުރުމަށް ސަރުކާރުން ގެންގުޅުއްވާ ވަޢުދުތަކުގެ ތެރެއިން މި މަޝްރޫޢަކީ ވަރަށް މުހިންމު މަޝްރޫޢެއްކަމަށް ވަޒީރު އާދަމް ޝަރީފް ވިދާޅުވިއެވެ. މި މަޝްރޫޢުގެ ސަބަބުން ރާއްޖޭގެ ތިމާވެށި ހިމާޔަތްކުރުމަށާއި، ދެމެހެއްޓެނިވި ތަރައްޤީއަށް ބޮޑު ކުރިއެރުމެއް ލިބިގެންދާނެކަމަށް ބެލެވެއެވެ.

ދުވާފަރުގައި "އިރުން ހަކަތަ"އިގެ ނަމުގައި އިޔާދަކުރަނިވި ހަކަތައިގެ މަޝްރޫއެއް ފަށައިފި

ރ. ދުވާފަރުގެ ރައްޔިތުންނަށް ދިގު އިންތިޒާރަކަށް ފަހު، އެރަށުގެ މަގުތައް ހެދުމުގެ ތިން ވަނަ ފިޔަވަހީގެ މަޝްރޫއުގެ މަސައްކަތް ރަސްމީކޮށް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ މިއަދު ހަވާލުކޮށްފިއެވެ. ރަށުގެ ތަރައްގީއަށް މުހިންމު މި މަޝްރޫއުގެ އެއްބަސްވުމުގައި ސޮއިކުރުމަށް ރ. ދުވާފަރުގައި ބޭއްވުނު ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ބައިވެރިވެވަޑައިގެންފައެވެ.

މި ރަސްމިއްޔާތުގައި މަގު ހެދުމުގެ އެއްބަސްވުމުގައި ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ފަރާތުން ސޮއިކުރެއްވީ އެ ވުޒާރާގެ ވަޒީރު ޑރ. ޢަބްދުﷲ މުއްތަލިބެވެ. އަދި އެމްޓީސީސީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު ޑީ.ސީ.ޕީ (ރޓ) އަހުމަދު ސައުދީއެވެ.

މި މަޝްރޫއަކީ ރައީސުލްޖުމްހޫރިއްޔާ ޑރ. މުޢިއްޒުގެ ސަރުކާރުން ރަށްރަށުގެ ތަރައްގީއަށް ދެއްވާ ސަމާލުކަމުގެ ދަށުން ކުރިއަށްގެންދާ މަޝްރޫއެކެވެ. ދުވާފަރުގެ މަގުތައް ހެދުމުގެ މަސައްކަތް އެމްޓީސީސީއާ ހަވާލުކުރެވުމުން، ރަށުގެ ދަތުރުފަތުރާއި އާންމު ދިރިއުޅުމަށް ފަސޭހަވެ، ރައްޔިތުންނަށް ގިނަގުނަ ފައިދާތަކެއް ލިބިގެންދާނެއެވެ. މި މަޝްރޫއުގެ ދަށުން ދުވާފަރުގެ މަގުތަކުގެ ފެންވަރު ރަނގަޅުކޮށް، ރައްޔިތުންނަށް ހިތްފަސޭހަ މާހައުލެއް ގާއިމުވެގެންދާނެ ކަމަށް ސަރުކާރުން އުންމީދުކުރެއެވެ.

ދުވާފަރުގެ މަގު ހެދުމުގެ މަޝްރޫއުގެ ތިންވަނަ ފިޔަވަހީގެ ދަށުން، 17,790 އަކަ މީޓަރުގެ ނުވަ މަގެއް ހެދުމާއި، 6,923 އަކަ މީޓަރުގެ ހިނގާ ސަރަހައްދެއް ގާއިމުކުރުން ހިމެނެއެވެ. މީގެ އިތުރުން 17,790 އަކަ މީޓަރުގެ ދުއްވާ ސަރަހައްދެއް ގާއިމުކުރުމާއި، ފެންހިންދާ ނިޒާމެއް ގާއިމުކުރުމާއި، މަގުބައްތި ހަރުކުރުމާއި، އަދި މަގުތަކުގައި ކުރަން ޖެހުނު އެކިއެކި މަސައްކަތްތައްވެސް މި މަޝްރޫއުގެ ދަށުން ކުރިއަށްގެންދާނެއެވެ. މިކަންކަމުގެ ސަބަބުން ރަށުގެ އަސާސީ ހިދުމަތްތަކުގެ ފެންވަރު ރަނގަޅުވެ، ދުވާފަރުގެ ރައްޔިތުންގެ ދިރިއުޅުމަށް ގިނަގުނަ ހެޔޮ ބަދަލުތަކެއް އަންނާނެކަމަށް ބެލެވެއެވެ.

ރ. ދުވާފަރުގެ މަގު ހެދުމުގެ ތިންވަނަ ފިޔަވަހީގެ މަސައްކަތް އެމްޓީސީސީއާ ހަވާލުކޮށްފި

ރ. ދުވާފަރުގައި ޤާއިމުކުރުމަށް ހަމަޖެހިފައިވާ ފުލުހުންގެ މަރުކަޒުގެ ޢަމަލީ މަސައްކަތް މިއަދު ރަސްމީކޮށް ފަށައިފިއެވެ. މި މަޝްރޫޢުގެ ދަށުން، ރަށުގެ ރައްޔިތުންނަށް ފުލުހުންގެ ޚިދުމަތްތައް ފަސޭހައިން ލިބިގެންދާނެއެވެ.

މި މަސައްކަތް ރަސްމީކޮށް ފަށްޓަވާފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން، މަސްވެރިންގެ ދުވަހުގެ ހަރަކާތްތަކުގައި ބައިވެރިވެވަޑައިގަތުމަށް ދުވާފަރަށް ކުރެއްވި ޒިޔާރަތުގައެވެ. މި ދަތުރުފުޅަކީ ރައީސް މުޢިއްޒު ވެރިކަމަށް ވަޑައިގެންނެވި ފަހުން ދުވާފަރަށް ކުރެއްވި ފުރަތަމަ ރަސްމީ ޒިޔާރަތެވެ.

ދުވާފަރު ފުލުހުންގެ މަރުކަޒުގެ ޢަމަލީ މަސައްކަތް ފެށުމުގެ ރަސްމިއްޔާތެއް މިއަދު އެރަށުގައި ވަނީ ބާއްވާފައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބައިވެރިވެވަޑައިގެންފައެވެ. ރަސްމިއްޔާތުގައި ފުލުހުންގެ މަރުކަޒުގެ އަމަލީ މަސައްކަތް ފަށްޓަވައިދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނެވެ.

މި މަޝްރޫޢު ހިންގުމަށް ހަވާލުކޮށްފައިވަނީ ދިވެހިރާއްޖޭގެ އެންމެ ބޮޑު ކޮންޓްރެކްޓިންގ ކުންފުނި ކަމަށްވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމް.ޓީ.ސީ.ސީ) އާއެވެ.

ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ފުޅާކޮށް، ފުލުހުންގެ މަރުކަޒުތައް ޤާއިމުކުރުމަކީ މި ސަރުކާރުގެ އެންމެ މުހިންމު ސިޔާސަތުތަކުގެ ތެރޭގައި ހިމެނޭ ކަމެކެވެ. މިއީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ސަރުކާރުން ކުރަމުންދާ މަސައްކަތްތަކުގެ މުހިންމު ބައެކެވެ.

ރ. ދުވާފަރު ފުލުހުންގެ މަރުކަޒުގެ ބިންގާ އަޅައި، ޢަމަލީ މަސައްކަތް ފަށައިފި

ރ. ދުވާފަރު ބަނދަރު ބޮޑުކުރުމުގެ ޢަމަލީ މަސައްކަތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން އެރަށަށް ކުރައްވާ ދަތުރުފުޅުގެ ތެރެއިން، ރަސްމީކޮށް ފަށައިފިއެވެ. މި މަސައްކަތް ފަށާފައިވަނީ މަސްވެރިންގެ ދުވަސް ފާހަގަކުރުމަށްޓަކައި ދުވާފަރުގައި ބޭއްވި ޚާއްޞަ ރަސްމިއްޔާތެއްގައެވެ.

ދުވާފަރު ބަނދަރު ބޮޑުކުރުމުގެ މި މަޝްރޫޢުގެ ޢަމަލީ މަސައްކަތް ފަށްޓަވައިދެއްވީ އިމާރާތްކުރުމާއި ގެދޮރުވެރިކަމާ ބިނާރާބެހޭ ވަޒީރު ޑރ. ޢަބްދުﷲ މުއްޠަލިބެވެ. މި މަޝްރޫޢުގެ މަސައްކަތް ކުރަނީ ދިވެހިރާއްޖޭގެ އެންމެ ބޮޑު ސަރުކާރު ކުންފުނި ކަމަށްވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްގެންނެވެ.

ސަރުކާރުން ވިދާޅުވާ ގޮތުގައި، ދުވާފަރަކީ ފުޅާ ދާއިރާއެއްގައި މަސްވެރިކަން ކުރާ ރަށެއްކަމުން، ބަނދަރު ބޮޑު ކުރުމުގެ މި މަޝްރޫޢުގެ ސަބަބުން އެރަށުގެ ބަނދަރު ބޭނުންކުރުމުގައި މަސްވެރިންނަށް މިހާރު ދިމާވާ ދަތިތަކަށް ބޮޑު ލުޔެއް ލިބިގެންދާނެއެވެ. މިއީ ރަށުގެ އިޤްތިޞާދަށް ވަރަށް ބޮޑު ކުރިއެރުމެއް ގެނެސްދޭނެ މަޝްރޫޢެއް ކަމަށް ލަފާކުރެވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދުވާފަރަށް ކުރައްވާ މި ދަތުރުފުޅުގައި، ދުވާފަރުގެ ތަރައްޤީގެ ގިނަ މަޝްރޫޢުތަކެއްގެ އަމަލީ މަސައްކަތް ފަށްޓަވައި ދެއްވުމާއި، ބައެއް މަސައްކަތްތަކުގެ ނިމުން ފާހަގަކުރެއްވުމަށް ހަމަޖެހިފައިވެއެވެ.

މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި ވަނީ ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގެންފައެވެ.

ދުވާފަރު ބަނދަރު ބޮޑުކުރުމުގެ ޢަމަލީ މަސައްކަތް ފަށައިފި

ގއ. ދިޔަދޫގައި ހުންނަ ވެމްކޯ ސައިޓެއްގައި މަސައްކަތްކުރާ މުވައްޒަފަކަށް ޑީސަލް ބޮވި، އެ ފުއްޕާމެއަށް ދިއުމުގެ ސަބަބުން ހާލު ސީރިއަސްވެ، މިހާރު އައިޖީއެމްއެޗުގެ އައިސީޔޫގައި ވެންޓިލޭޓަރުގައި ފަރުވާދެމުން އެބަދެއެވެ. މި ހާދިސާ ހިނގާފައިވަނީ ޖަނަރޭޓަރަކަށް ޑީސަލް އެޅުމުގެ މަސައްކަތުގެ ތެރޭގައެވެ.

ލިބިފައިވާ މައުލޫމާތުތަކަށް ބަލާއިރު، މި ހާދިސާ ހިނގާފައިވަނީ ޖަނަރޭޓަރަކަށް ޑީސަލް އަޅަންވެގެން ޑީސަލް ހަމަކުން ހޮޅިއެއް މެދުވެރިކޮށް ޑީސަލް ދަމަން އުޅުމުގެ ތެރޭގައެވެ. ވެމްކޯގެ އޮފިޝަލަކު މިކަން ކަށަވަރުކޮށްދެއްވަމުން ވިދާޅުވީ، މުވައްޒަފު އަވަހަށް މަސައްކަތް ކުރުމަށްޓަކައި ޑީސަލް ހަމެއްގެ ތެރެއަށް ހޮޅިއެއް ލުމަށްފަހު، އަނެއްކޮޅުގައި އަނގަޖަހައި ދަމާލުމުން އަނގައަށް ޑީސަލް އެޅި، އެ ޑީސަލް ބޮވުނީ ކަމަށެވެ.

 "ޑީސަލް ހަމެއްގެ ތެރެއްށް ހޮޅިއެއް ލައިގެން އަނގަ ޖަހާ ޑީސަލް ދަމާލީ އަވަހަށް އެ މަސައްކަތް ކުރުމަށް ޓަކައި ކަމަށް މިބެލެވެނީ، އެގޮތަށް ދަމަން އުޅުމުގެ ތެރޭގައި ޑީސަލް ބޮވުނީ، އެވަގުތު މުވައްޒަފު ބިރުން ތެޅެން ފެށުމުން ފުއްޕާމެއަށް ދިޔައީ ކަމަށް މިބަލަނީ. އެހިސާބުން ވަގުތުން ވަގުތަށް ދޭންޖެހޭ އަވަސް ފަރުވާދެވުނު މުވައްޒަފަށް."

ޑީސަލް ބޮވި، ފުއްޕާމެއަށް ދިޔުމުގެ ސަބަބުން ނޭވާލުމަށް ދަތިވެގެން، އެންމެ ފުރަތަމަ އޭނާއަށް ފަރުވާ ދެމުން އައީ ގއ. ވިލިނގިލި ހޮސްޕިޓަލުގައެވެ. އެހޮސްޕިޓަލުން ދެވުނު ފަރުވާގެ ފަހުން، އިތުރު ފަރުވާއަށް މާލެ ގެނެސް އައިޖީއެމްއެޗަށް ވަނީ ބަދަލުކުރެވިފައެވެ.

އައިޖީއެމްއެޗަށް ގެނައިއިރު މުވައްޒަފުގެ ހާލު ދެރަވެ، ވެންޓިލޭޓަރަށް ވެސް ލެވިފައިވާ ކަމަށް ވެމްކޯއިން މައުލޫމާތުދެއެވެ. ނަމަވެސް، މިހާރު އޭނާގެ ހާލު ރަނގަޅުވަމުން އަންނަކަން ހޮސްޕިޓަލުން އަންގާފައިވާ ކަމަށް އެ ކުންފުނިން ބުނެއެވެ. މި ވަގުތު އޭނާ އޮތީ ވެންޓިލޭޓަރުގައި ނަމަވެސް، ހާލު ސްޓޭބަލްކަމަށް މައުލޫމާތު ލިބެއެވެ.

މިފަދަ ހާދިސާތައް ހިނގަނީ ވަޒީފާގެ މާހައުލުގައި ސަލާމަތީ ފިޔަވަޅުތަކަށް ސަމާލުކަން ނުދެވޭ ގިނަ ފަހަރުކަން ފާހަގަކޮށްލެވެއެވެ. ވަރަށް ފަހުން ސަރުކާރު ކުންފުންޏެއް ކަމަށްވާ ސްޓެލްކޯގެ މުވައްޒަފަކު ވެސް ވަޒީފާގެ ތެރޭގައި ދިމާވި ހާދިސާއެއްގައި ވަނީ މަރުވެފައެވެ.

ވެމްކޯ މުވައްޒަފަކަށް ޑީސަލް ބޮވި، ހާލު ސީރިއަސްވެ ވެންޓިލޭޓަރުގައި ފަރުވާދެނީ

މ. ދިއްގަރުގެ މަސްވެރިކަމުގެ އުފެއްދުންތައް ބްރޭންޑުކޮށް، ގައުމީ އަދި ބައިނަލްއަޤްވާމީ ބާޒާރުގައި މާކެޓު ކުރުމަށްޓަކައި މޯލްޑިވްސް ފިޝަރީސް އެންޑް އޯޝަން ރިސޯސް މާކެޓިން އެންޑް ޕްރޮމޯޝަން ކޯޕަރޭޝަން (އެމްއެފްއޯއާރުއެމްޕީސީ) އާއި ދިއްގަރު މާކެޓިން ކޯޕަރޭޝަނާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމަކީ ދިއްގަރުގެ މަސްވެރިންނަށާއި މަސްވެރި އުފެއްދުންތައް އުފައްދާ ފަރާތްތަކަށް އިތުރު އާމްދަނީއެއް ހޯދައިދިނުމަށް އެޅުނު ވަރަށް މުހިންމު ފިޔަވަޅެއް ކަމަށް ސަރުކާރުން ބުނެއެވެ.

މި އެއްބަސްވުމުގައި އެމްއެފްއޯއާރުއެމްޕީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޑރ. މުހައްމަދު އިބްރާހިމެވެ. އަދި ދިއްގަރު މާކެޓިން ކޯޕަރޭޝަންގެ ފަރާތުން ސޮއިކުރެއްވީ ވައިސް ޗެއަޕާސަން އިސްމާއިލް މާހިދުއެވެ.

އެއްބަސްވުމުގައި ސޮއިކުރުމުގެ ރަސްމިއްޔާތަށްފަހު ޕީއެސްއެމަށް ދެއްވި އިންޓަވިއުއެއްގައި އެމްއެފްއޯއާރުއެމްޕީސީގެ ޗެއާމަން އަހުމަދު ޝަރީފް ވިދާޅުވީ، މިއީ ދިއްގަރުގައި އުފައްދާ އުފެއްދުންތައް މާކެޓު ކުރުމުގައި އެހީތެރިކަން ފޯރުކޮށްދިނުމަށް އެކުލަވާލި އެއްބަސްވުމެއް ކަމަށާއި، މި އެއްބަސްވުމާއެކު ދިއްގަރުގައި އުފައްދާ އުފެއްދުންތައް މާކެޓު ކުރުމަށް ވަރަށް ބޮޑު ކުރިއެރުމެއް ލިބިގެންދާނެ ކަމަށެވެ. މުސްތަގުބަލުގައި ރާއްޖޭގެ އެހެން ކައުންސިލްތަކާއެކު ވެސް މިފަދަ އެއްބަސްވުންތަކުގައި ސޮއިކޮށް އެހީތެރިކަން ފޯރުކޮށްދިނުމަށް އުންމީދު ކުރައްވާ ކަމަށް ޝަރީފް ވިދާޅުވިއެވެ.

"ހުރިހާ ރަށަކަށްވެސް ފުރުސަތު އޮންނާނެ. އަޅުގަނޑުމެންގެ މަސައްކަތަކީ، ރާއްޖޭގެ މަސްވެރިކަމުގެ އުފެއްދުންތައް ރާއްޖެއާއި ދުނިޔޭގައި މާކެޓުކުރުން،" ޝަރީފް ވިދާޅުވިއެވެ.

ޝަރީފް އިތުރަށް ވިދާޅުވީ، ރާއްޖޭގެ މަސްވެރިކަމުގެ އުފެއްދުންތައް ދުނިޔޭގެ ބާޒާރުގައި މާކެޓުކުރުމަކީ އެ ކުންފުނީގެ މަސައްކަތް ކަމަށާއި، މިފަދަ މަސައްކަތްތަކުގައި ހުރިހާ ރަށްތަކަށް ވެސް އެއްވަރަށް ފުރުސަތު އޮންނާނެ ކަމަށެވެ.

ދިއްގަރު ރިހާކުރުގެ ނަމުގައި އެހެން ރިހާކުރުތައް މާކެޓުގައި ވިއްކުމަކީ ދިމާވާ އެންމެ ބޮޑު މައްސަލައެއް ކަމަށް އެރަށު ކައުންސިލުން ވަނީ ފާހަގަކުރައްވާފައެވެ. އެހެންކަމުން މި އެއްބަސްވުމުގެ ސަބަބުން ދިއްގަރު އުފެއްދުންތައް ބްރޭންޑްކުރެވިގެން ބާޒާރަށް ނެރޭނެއެވެ. ދިއްގަރު ކޯޕަރޭޓިވް ސޮސައިޓީން ބުނެފައިވާ ގޮތުގައި، އެމްއެފްއޯއާރުއެމްޕީސީގެ އެހީތެރިކަމާއެކު އުފެއްދުންތައް މާކެޓުކޮށް އިޝްތިހާރުކުރެވުމުން އިތުރު މާކެޓުތައް ހޯދުމަށް ފަސޭހަވެ، ދިއްގަރުގައި މަސައްކަތްކުރާ ފަރާތްތަކަށް އާމްދަނީ ހޯދުމުގެ ފުރުސަތުތައް ފަހިވެގެންދާނެއެވެ.

މީގެއިތުރުން، ރާއްޖޭގެ މަސްވެރިކަމުގެ އުފެއްދުންތައް މާކެޓު ކުރުމަށް މޯލްޑިވްސް ފިޝަރީޒް އެންޑް އޯޝަން ރިސޯސް މާކެޓިން އެންޑް ޕްރޮމޯޝަން ކޯޕަރޭޝަނުން ވަނީ ޗައިނާގެ ހައިނަން އިންޓަނޭޝަނަލް އިކޮނޮމިކް އެންޑް ޓްރޭޑް ކޯޕަރޭޝަން ލިމިޓެޑާއެކުވެސް މިއަދު އެއްބަސްވުމެއްގައި ސޮއިކޮށްފައެވެ. ޗައިނާއާއެކު ވި މިއެއްބަސްވުމަކީ ރާއްޖޭގެ މަސްވެރިކަމުން އުފައްދާ އުފެއްދުންތައް ޗައިނާގައި މާކެޓު ކުރުމަށް ލިބުނު ރަނުގެ ފުރުސަތެއް ކަމަށް ސަރުކާރުން ދެކެއެވެ.

ދިއްގަރުގެ އުފެއްދުންތައް މާކެޓްކުރުމަށް އެއްބަސްވުމެއްގައި ސޮއިކޮށްފި

ބޮޑުކަންނެލީގެ މަސްވެރިން ކުރި މުޒާހަރާއާ ގުޅިގެން އިއްޔެ ހައްޔަރުކުރި ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު (މަޓޭ) ގެ ބަންދަށް ކްރިމިނަލް ކޯޓުން ފަސް ދުވަސް ޖަހައިފިއެވެ. މިކަމާ ދެކޮޅަށް އެމްޑީޕީގެ އިސްވެރިންނާއި ބޮޑުކަންނެލީގެ މަސްވެރިންގެ ޔޫނިއަނުން ވަނީ މިއަދު ކޯޓު ބޭރުގައި އަޑުއުފުލާފައެވެ.

މެންބަރު މައުރޫފްގެ ބަންދާމެދު ގޮތެއް ނިންމުމަށް މިއަދު މެންދުރު ކްރިމިނަލް ކޯޓަށް އޭނާ ހާޒިރުކުރުމުން، ކޯޓުން ވަނީ އޭނާގެ ބަންދަށް ފަސް ދުވަހުގެ މުއްދަތެއް ޖަހާފައެވެ. މައުރޫފް އާއި މަސްވެރިންގެ އިހްތިޖާޖުން ހައްޔަރުކުރި އިތުރު މީހުންގެ ބަންދުގެ މުއްދަތު އިތުރު ކުރުމާ ދެކޮޅަށް އެމްޑީޕީ އާއި ބޮޑު ކަންނެލި މަސްވެރިންގެ ޔޫނިއަންގެ މަސްވެރިން ވަނީ ކޯޓު ސަރަހައްދުގައި މިއަދު އަޑުއުފުލާ، ބަންދު މުއްދަތު އިތުރު ނުކުރުމަށް ގޮވާލާފައެވެ.

މަސްވެރިންގެ މުޒާހަރާ ފެށުނީ މި މަހުގެ 10 ވަނަ ދުވަހުގެ ހެނދުނުއެވެ. އެ މީހުން މުޒާހަރާކުރަމުން ދިޔައީ ސަރުކާރުން ކަންނެލި ގަނެ، މާކެޓު ކޮށްދީ ފައިސާ ހޯދައިދިނުމަށް ވީ ވައުދު ނުފުއްދާތީ ކަމަށް ބުނެއެވެ. މި އިހުތިޖާޖު އިއްޔެ މެންދުރެއް ހާއިރު ފުލުހުން ވަނީ ބާރުގެ ބޭނުންކޮށްގެން ރޫޅާލާފައެވެ. މި އޮޕަރޭޝަނުގައި ތިން މީހަކު ހައްޔަރުކޮށް ތިން ދޯނި ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.

ފުލުހުން ވިދާޅުވި ގޮތުގައި، މާލެ ކައިރީގައި މުޒާހަރާކުރަމުންދިޔައިރު ތަކުރާރުކޮށް ނަސޭހަތްދިނުމުން ވެސް އެކަންކަމަށް މަސްވެރިންގެ ޔޫނިއަނުން އިޖާބަ ދީފައިނުވާތީ، މުޒާހަރާ ރޫޅާލުމަށް ބާރުގެ ބޭނުންކުރަން ޖެހުނީއެވެ.

މެންބަރު މައުރޫފްގެ ބަންދަށް ފަސް ދުވަސް ޖަހައިފި

ދިވެހިރާއްޖޭގެ މޫސުމާ ބެހޭ ޤައުމީ އިދާރާ (މެޓު އޮފީސް) އިން މިއަދު ވިދާޅުވެފައިވަނީ، ކުރިއަށް އޮތް ހަފުތާގައިވެސް ދުންފުހުގެ އަސަރު ރާއްޖެއަށް ކުރަމުންދާނެކަމަށާއި، މިކަމުގެ ސަބަބުން ލޮލަށް ފެންނަ ދުރުމިން ދަށްވެ، ވައި ނުސާފުވާނެ ކަމަށެވެ.

މެޓު އޮފީހުން ވިދާޅުވި ގޮތުގައި، ދުންފުހުގެ ސަބަބުން އުތުރާއި މެދު ރާއްޖެ ތެރޭގައި މިހާރުވެސް ވައި ނުސާފުވެ، ހަމަ ލޮލަށް ސާފުކޮށް ފެންނަ ދުރުމިން ދަށްވެފައިވެއެވެ. ކުރިއަށް އޮތް ހަފުތާގެ ތެރޭގައިވެސް މި ހާލަތު ދެމިއޮންނާނެކަމަށް ބެލެވޭ ކަމަށް އެ އިދާރާއިން ވަނީ ހާމަކުރައްވާފައެވެ.

މިވަގުތު ރާއްޖޭގައި ދުރު ފެންނަ މިންވަރު ނުވަތަ ވިސިބިލިޓީ ހުރީ 5 ކިލޯ މީޓަރުގައެވެ. މެޓު އޮފީހުން ފާހަގަކުރެއްވި ގޮތުގައި، މީގެކުރީގެ ބައެއް އަހަރުތަކުގައި މި މިންވަރު 5000 މީޓަރު އަދި ބައެއް ފަހަރު 4000 މީޓަރަށްވެސް ދަށަށް ގޮސްފައިވެއެވެ.

އިރުވައި މޫސުމާ ކައިރި ދުވަސްވަރު މިފަދަ ހާލަތްތައް ކުރިމަތިވުން އާދަޔާ ހިލާފެއް ނޫން ކަމަށާއި، މިދިޔަ އަހަރުވެސް އިރުވައި މޫސުމާއި ކައިރި ދުވަސްވަރު ރާއްޖޭގައި ދުރު ފެންނަ މިންވަރު ދަށަށް ގޮސްފައިވާ ކަމަށް މެޓު އޮފީހުން ވަނީ ބުނެފައެވެ.

ވައި ނުސާފުވެ، ކުރިއަށް އޮތް ހަފުތާގައިވެސް ދުންފުހުގެ އަސަރުކުރާނެކަމަށް މެޓުން ބުނެފި

ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަގާމަށް، ދިވެހި މީޑިއާ ދާއިރާގެ ތަޖުރިބާކާރު އަޙުމަދު ޝަކީބް (ޝަކިއްބެ) މިއަދު އައްޔަންކޮށްފި އެވެ. ޝަކީބަކީ މި ސަރުކާރުން ޕީއެސްއެމްގެ އެމްޑީގެ މަގާމަށް އައްޔަންކުރި ހަތަރުވަނަ ފަރާތެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ހާމަކުރެއްވި ގޮތުގައި، ޓީވީއެމްގެ ޕްރެޒެންޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރެއްވި ޝަކީބް ދައުލަތުގެ މީޑިއާގެ މެނޭޖިން ޑިރެކްޓަރުގެ މަގާމަށް އައްޔަންކުރައްވާފައިވަނީ، ކުރިން އެ މަގާމު ފުރުއްވި އިބްރާހިމް ނަސްރީން މިދިޔަ ނޮވެމްބަރު 29 ގައި އިސްތިއުފާ ދެއްވުމުން ހުސްވި މަގާމަށެވެ.

ޝަކީބަކީ ދިވެހި މީޑިއާ ދާއިރާގައި ގިނަ ދުވަސްތަކެއްގެ ތަޖުރިބާ ހުރި ފަރާތެކެވެ. ރައީސް ޑރ. މުހައްމަދު މުއިއްޒުގެ ހާއްސަ ޕޮޑްކާސްޓް އެންމެ ފަހުން ހުށަހަޅުއްވަމުން ގެންދެވި ޝަކީބް ވަނީ ޓީވީއެމްގެ "ތިޔަބޭފުޅުންގެ ފުރުސަތު"، "އެހާރާއި މިހާރު"، "އެހަނދާނުގައި"، "ހޭޔަންބޯ" އަދި "ދިވެހިރާއްޖޭގެ އެންމެ އަލިގަދަ ތަރި" ފަދަ ބޮޑެތި ޓީވީ ޝޯތައް ހުށަހަޅުއްވައި ދެއްވައިފަ އެވެ.

މީޑިއާ ދާއިރާގެ އިތުރުން، ޝަކީބް އެންމެ ގިނަ ދުވަސް ވަންދެން މަސައްކަތް ކުރެއްވީ ޑިޕާޓްމަންޓު އޮފް ޕަބްލިކް އެގްޒެމިނޭޝަން (ޑީޕީއީ) ގަ އެވެ. އެ ތަނުގެ ޑިރެކްޓަ ޖެނެރަލްގެ މަގާމުގައި ހުންނަވަނިކޮށް ބަދަލުކުރީ ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އަށެވެ. އެއާ އެކު، މިދިޔަ އަހަރުގެ ޖުލައި މަހު ތައުލީމީ ދާއިރާ އިން އޭނާ ރިޓަޔާ ކުރެއްވީ އެވެ.

ޕީއެސްއެމްގެ މެނޭޖިން ޑިރެކްޓަރަކަށް އަޙުމަދު ޝަކީބް އައްޔަންކޮށްފި

މާލޭ ބޮޑުތަކުރުފާނު މަގުގެ ބޭރު މަގު ތަރައްގީ ކުރުމުގެ މަޝްރޫއުގެ ދަށުން އިއްޒުންދީން ފާލަމާ ދިމާލުން ހަދާ ބައިގެ ތާރު އެޅުމުގެ މަސައްކަތް އެއްކޮށް ނިންމައި އާއްމުންނަށް ހުޅުވާލައިފިއެވެ. މި މަގު ހަތަރު ލޭނަކަށް ތަރައްގީ ކޮށްފައިވާއިރު، މިކަމަށް ގިނަ ބަޔަކު ސޯޝަލް މީޑިޔާ މެދުވެރިކޮށް ހިތްހަމަޖެހުން ފާޅުކޮށްފައިވެއެވެ.

ލޯކަލް މާރުކޭޓް ސަރަހައްދުން ފެށިގެން ހުޅުމާލޭ ފެރީ ޓާމިނަލްއާ ހަމައަށް ތަރައްގީ ކުރަން ހަމަޖެހިފައިވާ ބޭރު މަގު ސެގްމަންޓުތަކަށް ބަހާލައިގެން ހެދުމުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓް މަހުގެ 21 ވަނަ ދުވަހުގައެވެ. ތިން ސެގްމަންޓަކަށް ބަހާލައިގެން ކުރިއަށްގެންދާ މި މަސައްކަތުގެ ދަށުން ފުރަތަމަ ބައި ނިންމައި އާއްމުންނަށް ހުޅުވާލާފައިވާއިރު، މި ބައިގެ ދަށުން 830 މީޓަރުގެ މަގުގައި ތާރު އެޅުމާއި، 4 ލޭންއަށް މަގު ހެދުމާއި، ދުވާރުތައް ހެދުމުގެ އިތުރުން ފެން ހިންދާ ނިޒާމެއް ވެސް ވަނީ ގާއިމުކޮށްފައެވެ. މީގެ އިތުރުން، ސަބްބޭސް ތައްޔާރު ކުރުމާއި ހިނގާ މީހުންނަށް ވަކި ލޭނެއް ވެސް މި މަޝްރޫއުގެ ދަށުން ގާއިމު ކުރެވިގެންދާނެއެވެ.

ފުރަތަމަ މި މަޝްރޫއުގެ ތާވަލުގައި ލޯކަލް މާރުކޭޓް ސަރަހައްދުގެ މަގު ތަރައްގީކުރުން ހިމެނިފައިނުވި ނަމަވެސް، ފަހުން އެ ސަރަހައްދުގެ ބޭރު މަގު ވެސް ތަރައްގީ ކުރަން ހަމަޖެހިފައިވާ ކަމަށް ކަމާބެހޭ ފަރާތްތަކުން ހާމަކުރެއެވެ. ދެން އޮތީ މި ސެގްމަންޓުގެ މަސައްކަތް ފެށުމެވެ. ރައީސް ޑރ. މުހައްމަދު މުޢިއްޒު ވަނީ، މި ސެގްމަންޓުގެ މަސައްކަތް ކުރިއަށް އޮތް ރަމަޟާން މަހުގެ ކުރިން ނިންމާލެވޭތޯ މަސައްކަތް ކުރަމުންދާ ކަމަށް ވިދާޅުވެފައެވެ.

ނިމިދިޔަ އޭޕްރީލް މަހު އެމްޓީސީސީއާ ހަވާލުކޮށްގެން ކުރިއަށް ގެންދާ މި މަޝްރޫއުގެ ޖުމްލަ އަގަކީ 144 މިލިއަން ރުފިޔާއެވެ. މި މަޝްރޫއުގެ ސަބަބުން މާލޭގެ ދަތުރުފަތުރުގެ ނިޒާމަށް އިތުރު ފަސޭހަތަކެއް ލިބި، ރައްޔިތުންނަށް ދިމާވާ ދަތުރުފަތުރުގެ ދަތިތަކަށް ހައްލެއް ލިބިގެންދާނެ ކަމަށް ބެލެވެއެވެ. އިތުރުކޮށްލާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާއި ހަވާލުވި ފަހުން ރައްޔިތުންނަށް ބޭނުން ތެރި ބޮޑެތި ބަދަލުތައް ފެނެއެވެ.

ބޭރު މަގު ތަރައްގީ ކުރުމުގެ ފުރަތަމަ ބައި ހުޅުވައިފި: އާއްމުންގެ ބޮޑު ހިތްހަމަޖެހުމެއް

މިދިޔަ އަހަރުގެ ޑިސެންބަރު މަހުގެ 12 ވަނަ ދުވަހު އޭރު ތިން ވުޒާރާއެއް ހިންގަމުންދިޔަ އިމާރާތްތަކުގައި ހިނގި އަލިފާނުގެ ހާދިސާގައި ލިބުނު ގެއްލުންތަކުން އަރައިގަތުމަށް، ޗައިނާ ސަރުކާރުން 2.8 މިލިޔަން ޑޮލަރުގެ އެހީއެއް ދިވެހި ސަރުކާރަށް ދެއްވައިފިއެވެ. މި އެހީގައި ހާދިސާގައި ގެއްލުނު ތަކެތީގެ ބަދަލުގައި ބޭނުންވާ އޮފީސް ސާމާނާއި ފަރުނީޗަރު ހިމެނެއެވެ.

މިދިޔަ އަހަރުގެ ޑިސެމްބަރު 12 ވަނަ ދުވަހުގެ ރޭ ދިވެހިރާއްޖޭގެ އަޑުގެ އިމާރާތް ކުރިމަތީގައި ހުރި އިމާރާތުގައި އަލިފާން ރޯވިއިރު، އެ އިމާރާތުގައި އޭރު ހިންގަމުންދިޔައީ ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއާއި އިމާރާތްކުރުމާއި ބިނާރާ ބެހޭ ވުޒާރާއެވެ. 

މީގެ އިތުރުން، އެ އިމާރާތާ ޖެހިގެން ހުރި ގްރީން ބިލްޑިންގައި ވެސް އަލިފާން ރޯވެ، އެތަނުގައި ހިންގަމުންދިޔަ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާއި އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އަށް ވެސް ވަނީ ބޮޑެތި ގެއްލުންތަކެއް ލިބިފައެވެ. މި ހާދިސާގައި މި އިމާރާތްތައް ބޭނުން ނުކުރެވޭ ވަރަށް އަނދާފައިވާއިރު، މި ވުޒާރާތަކާއި އިދާރާގެ މަސައްކަތްތައް މިވަގުތު ކުރަމުންދަނީ ދަރުބާރުގޭގައެވެ.

ޗައިނާ ސަރުކާރުން ދެއްވި މި 2.8 މިލިޔަން ޑޮލަރުގެ އެހީ ދިވެހި ސަރުކާރާ ހަވާލުކޮށްދެއްވީ ރާއްޖެއަށް ކަނޑައަޅުއްވާފައި ހުންނަވާ ޗައިނާގެ ސަފީރު ކޮންގް ޒިންހުއާ އެވެ. ސަރުކާރުގެ ފަރާތުން އެހީއާ ހަވާލުވެވަޑައިގަތީ މާލީ ކަންކަމާ ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރެވެ.

އެހީ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މާލީ ވަޒީރު މޫސާ ޒަމީރު ވިދާޅުވީ، ޗައިނާއިން ދެއްވި މި އެހީތެރިކަމުގެ ސަބަބުން ސަރުކާރުގެ މުހިންމު މަސައްކަތްތައް އަލުން ފެށުމަށް މުހިންމު ދައުރެއް އަދާކުރާނެ ކަމަށެވެ. އަދި މި އެހީތެރިކަން، ދެ ޤައުމުގެ ދެމެދު އޮތް ގާތް ގުޅުން ރަމްޒުކޮށްދޭކަމަށް ވެސް ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައި، ޢުމްރާނީ ގޮތުންނާއި އެނޫންވެސް ދާއިރާތަކަށް ޗައިނާއިން ރާއްޖެއަށް ދޭ އެހީތެރިކަމާއި ދޭ އެއްބާރުލުން ފާހަގަކުރައްވައި ޝުކުރުއަދާކުރެއްވިއެވެ. މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ދަތުރުފުޅުތަކާއި، ޗައިނާގެ ރައީސް ޝީ ޖިންޕިންގއާ ބައްދަލުކުރެއްވުމުގެ ސަބަބުން ދެ ޤައުމުގެ ދެމެދު އޮތް އިތުބާރު އިތުރުވެ، އެ ގުޅުން ފުޅާވެފައިވާކަން ވެސް ވަޒީރު ފާހަގަކުރެއްވިއެވެ.

ވަޒީރު މޫސާ ޒަމީރު ވާހަކަފުޅު ނިންމަވާލައްވަމުން ޗައިނާއިން ދިން އެހީތެރިކަމަށް އަލުން ވެސް ޝުކުރުއަދާކުރައްވައި، ދެ ޤައުމަށް ވެސް ފައިދާވާނެ ގޮތަށް ޗައިނާއާ އެކު އޮތް ގާތް ގުޅުން އިތުރަށް ބަދަހިކުރުމަށް އަބަދުވެސް މަސައްކަތްކުރައްވާނެކަން ހާމަކުރެއްވިއެވެ.

ތިން ވުޒާރާގައި ހިނގި އަލިފާނުގެ ހާދިސާ: ޗައިނާއިން 2.8 މިލިޔަން ޑޮލަރު އެހީއެއް ދީފި

މަސްވެރިންގެ އިޙްތިޖާޖުގައި ފުލުހުންގެ ވާޖިބަށް ހުރަސްއެޅުމާއި ގުޅިގެން ދެ ދޯންޏާއި ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ދިވެހި ފުލުހުންގެ ޚިދުމަތުން މިއަދު ވިދާޅުވެއްޖެއެވެ. މިކަން ހާމަކުރައްވާފައިވަނީ ފުލުހުންގެ ރަސްމީ އިދާރާއިންނެވެ.

މަސްވެރިންގެ ދުވަހާއި ގުޅިގެން އިއްޔެއިން ފެށިގެން މާލޭގެ 4 ނަމްބަރު ޖެޓީ ކުރިމަތީގައި މަސްވެރިންތަކެއް އަންނަނީ އިޙްތިޖާޖްކުރަމުންނެވެ. މި އިޙްތިޖާޖުގެ މައިގަނޑު މަޤްޞަދަކީ މަސްވެރިކަމުގެ ދާއިރާގައި ހުރި ގޮންޖެހުންތަކާއި، ޚާއްސަކޮށް ބޮޑު ކަންނެލީގެ މަސްވެރިންނަށް ދިމާވާ ދަތިތަކަށް ސަރުކާރުގެ ސަމާލުކަން ހޯދުމެވެ.

މި އިޙްތިޖާޖުގައި ބައިވެރިވި ބައެއް ދޯނިތަކުގައި ބިދޭސީން ޙަރަކާތްތެރިވަމުންދާކަން ފާހަގަވުމާއި ގުޅިގެން، އެމީހުން މި އިޙްތިޖާޖުގައި ބައިވެރިނުވުމަށް ކަމާ ބެހޭ ފަރާތްތަކުންވަނީ އިލްތިމާސްކުރައްވާފައެވެ. ދިވެހި ފުލުހުންގެ ޚިދުމަތުން ވިދާޅުވީ، އިޙްތިޖާޖު ކުރާ ދޯނިތަކުގައި ބިދޭސީން ޙަރަކާތްތެރިނުވުމަށް ނަސޭޙަތްތެރިވީ ނަމަވެސް، ބައެއް ދޯނިތަކުގައި ބިދޭސީން ތިބިކަން ފާހަގަވުމާއި ގުޅިގެން، ފުލުހުންނާއި މޯލްޑިވްސް އިމިގްރޭޝަނުން އެ ދޯނިތަކުގައި މަސައްކަތްކުރާ ބިދޭސީންނާ ގުޅޭ މަޢުލޫމާތު ހޯދުމަށް މަސައްކަތް ކުރަމުންދާކަމަށެވެ. އެގޮތުން، އިޙްތިޖާޖުގައި ބިދޭސީން ޙަރަކާތްތެރިވަމުންދާކަމަށް ފާހަގަކުރެވޭ ދޯނިތަކަށް ފުލުހުން މިއަދު އަރާފައިވާ ކަމަށް ފުލުހުން ވިދާޅުވެއެވެ.

މި އިޙްތިޖާޖާއި ގުޅިގެން މިހާތަނަށް ދެ ދޯންޏެއް ފުލުހުންގެ ބެލުމުގެ ދަށަށް ގެންގޮސްފައެވެ. އަދި ފުލުހުންގެ ވާޖިބަށް ހުރަސް އެޅިކަމުގެ ތުހުމަތުގައި ތިން މީހަކުވެސް ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވިދާޅުވެއެވެ. އޭގެތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މަޢުރޫފް ޒާކިރުވެސް ހިމެނޭކަމަށް ފުލުހުން ހާމަކުރައްވައެވެ.

ބޮޑު ކަންނެލީގެ މަސްވެރިންގެ މި އިޙްތިޖާޖާއި ގުޅިގެން މަސްވެރިންގެ ހުރި ކަންބޮޑުވުންތައް ހައްލުކުރުމަށް ސަރުކާރުން މަސައްކަތް ކުރަމުންދާކަމަށް މަސްވެރިކަމާއި ބެހޭ ވުޒާރާއިންވަނީ ވިދާޅުވެފައެވެ. އެގޮތުން، މަސްވެރިންނަށް ފަސޭހައިން އަގުހެޔޮކޮށް ތެޔޮ ލިބޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާއިރު، ކަންނެލި މަސްވެރިންނަށް ޚާއްސަ މަސް ޕްރޮސެސްކުރާނެ ފެސިލިޓީއެއް ހުޅުމާލޭގައި ޤާއިމުކުރުމުގެ މަސައްކަތްވެސް ކުރަމުންދާކަން ސަރުކާރުންވަނީ ހާމަކުރައްވާފައެވެ.

ޙަބަރު